KORONADAL CITY- Ginpasakaan na sang kaso ang 10 ka tawo nga naarestar sang Sto. Niño PNP sa bulig sang PDEA 12 sa ginpatigayon nga anti-illegal drugs operation kag operasyon batuk sa iligal nga sugal sa Prk. Lovers Brgy. Ambalgan, Sto. Niño South Cotabato.
Nahibaluan nga target sang buy-bust operation sanday Helen Lampa Edsel, 25 anyos, single kag residente sang nasambit nga lugar kag Cantong Makapendig Wahab, 48 anyos nga residente sang Brgy. Lagandang Isulan Sultan Kudarat kun diin magluwas sa pila ka mga pakete sang shabu narekober man sa mga ini ang isa ka fragmentation hand grenade.
Kadungan man sa mga naarestar sa ginakutaan sang mga ini ang 5 pa nga nagahimo sang iligal nga sugal nga sanday Remie Kansay Deles, 26 anyos, Jessie Manero Sabico, 50-anyos wala sang trabaho, Kamlon Kansat Samiana, 45-anyos, isa ka mangunguma, Ryans Salimula Santiago, 25-anyos kag June Jay Cabantud Calanza nga mga residente sang nasambit nga lugar.
Dugang pa nga wala man nakaluwas ang 3 ka iban pa nga nagpakuno-kuno nga mga sugarol nga sanday Sheala May Palma Lachica, 19-anyos, Efren Palagyan Deles 25, kag isa ka Loko Bakulodan Marot, 23 kun diin narekober sa ila ang tag-isa ka small sachet sang shabu.
Sa subong, yara na sa kustodiya sang PNP ang mga suspek samtang, ang fragmentation hand grenade ang ginturn-over sa South Cotabato ordinance Division.
