KORONADAL CITY – Padayon nga ginapangita sa subong nga mga tinion sang mga otoridad ang isa ka inmate sang South Cotabato Provincial Jail makaligad nga nagpalagyo kagina sang aga samtang yara sa ward sang South Cotabato Provincial Hospital.
Ini ang kumpirmar ni Dr.Conrado Braña, Chief of Hospital sang South Cotabato Provincial Hospital sa interview sang Bombo Radyo Koronadal.
Suno kay Braña, nakita pa niya nga naga kaun pa sang iya nga rasyon sa ward si Regie Grecia, 29 anyos na residente ng Purok Tagumpay, Depita Subd., Koronadal City kag naga pamahaw.
Hinali nalang suno pa nga nadula ini sa ward kag sa tion nga ginpangita ini sang mga katapo sang South Cotabato Provincial Hospital sa pila ka mga banyo , wala na ini nakita pa.
Dugang pa sang opisyal, gindangat ini kagab-e sa pasilidad bangod sa kalain sang pamatyagan sini kag bangud nagpositibo ini sa balatian nga Covid-19.
Si Grecia ang kasamtangan nga naga pangatubang sang kaso nga paglapas sa Republic Act 9165 o Comprehensive Dangerous Drugs Act of 2002,magluwas pa sa Covid-19, may sakit man ini nga Tuberculosis.
Nahibaluan nga nagpalagyo ang nasambit nga persona halin sa 3rd Floor sang provincial hospital kag ginapatihan nga nagpuli sa ila nga lugar sa Casa Subdivision, Zone III, Koronadal City apang sang ginpangita na ini sang mga kapulisan , wala na ini naabtan pa.
Nadakpan naman ini sa banwa sang Polomolok kagina sang udto.
Nagapanawagan naman ang opisyal sa mga katapo sang South Cotabato Rehabilitation ang Detention Center sang kooperasyon agud nga indi na maliwat pa ang nasambit nga panghilitabo.
