KORONADAL CITY – Nagdipensa ang kapulisan sa akusasyon nga masaker ang natabo nga pagpatay sa 9 ka mga drug suspects sa ginpatigayon nga anti-drug operation sang mga otoridad sa Sitio Biao,Barangay Kilada Matalam North Cotabato.
Ginpahayag sa Bombo Radyo Koronadal ni Police Chief Insp. Sonny Leonsito, hepe sang Matalam PNP, nga ang mga suspek ang una nga nagpalupok sa raiding team gamit ang matag-as nga kalibre sang armas luthang nga nagresulta sa engkwentro sa sulod sang 45 minuto.
Aminado si Leonsito nga kilala nga drug den ang lugar bangud sa maghimata lamang ang nagaduso sang droga.
Sa pagkamatuod, wala nagasulod ang mga residente sa kaiping nga lugar didto agud nga indi masal-an nga nagabakal sang droga.
Apang, indi man makumpirma ni Leonsito kun katapu sang isa ka dako nga drug syndicate ang mga ini.
Ang maathag lamang suno pa amo nga may mga mabaskog nga armas luthang ang mga suspek nga palatandaan nga nagapatigayon sila sang operasyon indi lamang sa Matalam kundi mangin sa mga kaiping nga probinsiya sa North Cotabato.
Sa subong, yara na sa kustodiya sang mga otoridad ang 2 ka naarestar nga suspek samtang ginlubong naman sang tagsa nila ka pamilya ang 9 ka mga napatay base sa kultura nga Islam.
