Mariing itinanggi ni Sara Duterte ang mga alegasyong ibinato laban sa kanya ng isang nagpakilalang dating aide, na umano’y tumulong sa kanyang pag-aaral ng batas.
Sa kanyang opisyal na pahayag nitong Abril 15, iginiit ng Bise Presidente na ang mga paratang ni Ramil Madriaga ay pawang “kasinungalingan,” at nagmumula sa isang indibidwal na umano’y nahaharap sa kasong kidnapping at kasalukuyang nakakulong.
Binigyang-diin ni Duterte na natapos niya ang kanyang law degree sa sariling pagsisikap, at hindi kailanman humingi ng pabor o espesyal na konsiderasyon mula sa sinumang propesor upang makapasa. Ayon pa sa kanya, ang mga akademikong requirement sa law school ay kayang maabot nang walang tulong mula sa iba.
Inulit din niya ang kanyang rekord sa Bar Exam—na kanyang naipasa noong 2005 sa unang pagtatangka—bilang patunay ng kanyang kakayahan at kredibilidad bilang abogado.
Nauna nang tinuligsa ng kanyang kampo ang mga pahayag ni Madriaga sa pagdinig ng House Justice Committee, kung saan tinawag ang mga ito na “delusional” at “pure fiction.”
Lumilitaw ang isyung ito sa gitna ng mas malawak na tensyong politikal, kabilang ang mga usapin ng impeachment, na ayon kay Duterte ay posibleng dahilan ng mga umano’y pagtatangkang sirain ang kanyang reputasyon.
