Ginpahayag ni US Presidente Donald Trump sang Lunes (oras sa Amerika) nga nakapirma na ang United States kag Iran sang isa ka memorandum of understanding nga nagatinguha nga tapuson ang nagapadayon nga tensyon sa Gulf region kag mabuksan liwat ang Strait of Hormuz.
Suno kay Trump, “The deal’s all signed,” samtang yara siya sa G7 Summit sa France.
Dugang pa niya, bahin nga nabuksan na liwat ang agianan sang petrolyo nga naapektuhan sang blockade sa nagligad nga mga bulan.
Ginakabig naman nga himuon ang espesyal nga seremonya sa Geneva sa Biyernes, samtang ginapaabot nga ipaguwa sa publiko ang bug-os nga detalye sang kasugtanan sa masunod nga mga adlaw.
Apang, gilayon ini nga ginpakamalaot sang mga kritiko sang Estados Unidos.
Nanawagan si Chuck Schumer nga ipaguwa na sa publiko ang bug-os nga unod sang kasugtanan kag ipahayag kon ano ang baylo sini, lakip na ang epekto sa seguridad sang Estados Unidos.
Kadungan sang pagpirma sang kasugtanan, ginpahayag man nga nagnubo ang presyo sang petrolyo sa pangkalibutanon nga merkado bangud sang paglaom nga matapos na ang krisis sa suplay, samtang nagsaka naman ang mga stock market indices.
Lakip man sa kasugtanan, luwas sa pagbukas sang Strait of Hormuz, ang pagpatuman sang 60 ka adlaw nga ceasefire agud mapadayon ang negosasyon bahin sa mas dako nga mga isyu, lakip ang nuclear program sang Iran kag posible nga pagkakas sang mga sanction.
Madumduman nga nauna na nga nagpahayag ang pila ka opisyal sang U.S. nga mahimo nga magdala ini sang dako nga benepisyo sa ekonomiya sang Iran, apang may kondisyon nga indi ini maghimo sang nuclear weapon.
Sa pihak nga bahin, nagapadayon gihapon ang tensyon sa rehiyon, labi na sa Lebanon, kun sa diin padayon ang kinagamo sa tunga sang Israel kag Hezbollah.
May mga datos man sang panibag-o nga drone strike sa southern Lebanon pila ka oras matapos gin-anunsyo ang kasugtanan.
Wala pa sang opisyal nga pahayag ang Israel bahin sa kasugtanan, apang suno sa pila ka opisyal sang pungsod, wala sila nalipay sa amo nga kasugtanan.
