KORONADAL CITY- Ginapreparar na sang mga otoridad ang kaso nga ipasaka batuk kay Retired Army Rodolfo Ecija nga gin-arestar matapos makuhaan sang nagkalain-lain nga sahi sang armas sa ginpatigayon nga operasyon sang mga otoridad.
Sa interbyu sang Bombo Radyo Koronadal kay Police Sr/Supt. Raul Supiter, Provincial Director sang Sultan Kudarat PNP, ginpahayag sini nga madugay na nila nga ginasubaybayan ang amay ni Mayor Randy Ecija kag naguwa nga madamo ini sang ginatago nga armas kag private armies.
Magluwas sa iya, arestado man ang siyam ka iban pa nga nga ginapatihan nga private armies sini nga gilayon ginpaidalom sa interogasyon.
Suno kay Supiter, igakostudiya nila si Ecija kag mga kaupdanan sini agud nga pormal nga mapasakaan sang kaso sa lunes, Nobyembre 6, 2017 nga paglapas sa illegal possession of firearms and explosives.
Samtang, ginpahayag man sang opisyal nga madamo sang reklamo sang pagpang-abuso batuk ka Ecija kun diin nagtukod pa sang detachment ang mga ini sa banwa sang Senator Ninoy Aquino nga ginkahadlok sang mga residente sa lugar.
Nakuha sa posisyon sang mga suspek ang napulo ka M16 rifle; apat ka M14 rifle; duha ka carbine; isa ka cal. 30; machine gun; tatlo ka kalibre 45; granada kag iban pa.
