KORONADAL CITY – Igapatuman ang hugot nga seguridad para sa igapatigayon nga dako nga campaign rally sa siyudad sang Cotabato subong nga adlaw, Disyembre 10, bilang una nga serye sang Bangsamoro Organic Law (BOL) campaigns.
Sa nasambit nga aktibidad, ginalauman nga pagatambongan ini sang mga kautoran naton nga Moro, Lumad kag mga Kristiyano.
Una na nga ginpahayag sa Bombo Radyo Koronadal ni MILF vice chairman for political affairs Ghadzali Jaafar nga dapat suportahan sang tanan ang BOL bangud makaayo ini sa tri-people kag indi lamang sa mga Moro kag hatagan ini sang tion.
Madumdoman nga sa pag-umpisa sang nakaligad nga mga inadlaw sang kampanya para sa ratipikasyon sang BOL pinaagi sa plebisito nga pagahiwaton sa madason nga tuig, nangin mapisan ang MILF kag iban pa nga sektor sa pagpangampanya.
Kadungan sini, gin-awhag man ni Jaafar ang mga pumuluyo sang proposed Bangsamoro Autonomous Region in Muslim Mindanao ukon BARMM nga makig-ugyon sa plebisito sa madason nga tuig.
