KORONADAL CITY – Ginapreparahan na sang Tampakan LGU ang mga kaso nga igasang-at batok sa katapo sang PNP-Special Action Force nga nagbayolar sa quarantine protocol rason nga ginpaidalom sa walo ka adlaw nga temporary lockdown ang apat ka purok sa Brgy. Lambayong.
Sa interbyu sang Bombo Radyo Koronadal kay Tampakan Mayor Leonard Escobillo, ginpahayag sini nga gintugyan na niya ang nasambit nga isyu sa iya legal team agud pormal nga mapasakaan sang kaso ang nasambit nga pulis.
Dugang ni Escobillo, ginbutang sa ital-ital sang nasambit nga pulis ang kaluwasan sang mga pumuluyo sini bangud wala ini nagtuman sa quarantine protocol apesar nagpositibo ini sa covid-19 virus.
Nahibaloan nga gintago sang pulis ang balatian sini kag nahibaloan na lamang nga positibo sa covid-19 makaligad ang ginpatigayon nga confirmatory test sang nagpauli ini sa Malalag, Davao del Sur.
