KORONADAL CITY – Nagapanawagan sa subong ang mga survivors sang Marawi siege nga taga-siyudad sang Koronadal nga untatan na ang giyera sa siyudad sang Marawi agud nga makapangabuhi nga matawhay ang tanan.
Ang nasambit nga apela ang ginpahayga sang mga survivors matapos nga makapauli na sa siyudad kag makaupod na nag tagsa nila ka pamilya.
Sa eksklusibo nga interbyu sang Bombo Radyo Koronadal kay Jun Otik, isa sa mga survivors sa Marawi, ginpahayag sini nga maswerte sila kag nakapalagyo sa kamot sang Maute terror group apang mas makaluluoy suno pa ang mga sibiliyan nga hostage pa sa subong sang mga ISIS linked group kag padayon nga naipit sa engkwentro bangud sa pag-atake sang mga suldado kag pagpatigayon sang airstrike.
Suno pa kay Otik, kun wala sila nagpangisog nga magpalagyo sigurado nga ginpatay na sila sang mga Maute bangud nahibaluan na suno pa nila ang ginapanaguan nga puluy-an sang mga ini kaupod ang masobra 20 ka mga construction workers nga mga Kristiyano.
Kadungan sini, nag-apela man sang bulig si Otik para sa ila nga pamilya bangud suno sa iya tubtob sa subong yara na sa state of trauma pa sila kag halos indi makatrabaho bangud sa malain nga eksperiensiya.
Ginpakigbahin man ni Otik sa Bombo Radyo ang ila nga naeksperiensiyahan sa sulod sang halos isa ka semana nga pagka-stranded sa lugar nga suno madamo sang nagabantay nga mga snipers sang Maute kag halos mabungol na sila sa mabaskog nga nilukpanaysang duha ka grupo.
Madumduman nga ginsugat sang rescue team sang city government sang Koronadal ang mga biktima kag ginbuligan nga makapauli na sa tagsa nila ka pamilya.
