KORONADAL CITY – Gilayon nga nagdihon sang special investigation task group (SITG) ang PNP-12 nga magatutok sa imbestigasyon sa nagluntad nga bus bombing sa siyudad sang Tacurong.
Sa eksklusibo nga interview sang Bombo Radyo Koronadal kay P𝐂𝐎𝐋 𝐑ogelio Raymundo, 𝐃𝐞𝐩𝐮𝐭𝐲 𝐃𝐢𝐫𝐞𝐜𝐭𝐨𝐫 𝐟𝐨𝐫 𝐎𝐩𝐞𝐫𝐚𝐭𝐢𝐨𝐧𝐬 at 𝐒𝐈𝐓𝐆 𝐘𝐞𝐥𝐥𝐨𝐰 𝐁𝐮𝐬 𝐂𝐨𝐦𝐦𝐚𝐧𝐝𝐞𝐫, maathag ang direktiba sa special task group nga kilalahon ang responsable sa pagpasigabong agud nga pasabton ila nga ginhimo.
Suno kay Raymundo,nagsugod na ang task group sa mas madalom nga imbestigasyon kag sa pagkamatuod ginauyatan na nila ang CCTV footage sang mismo nga nagsigabong nga bus.
Aminado naman ang opisyal nga mabudlay pa karon nga mahibaluan kun nakapanaug ang mismo nga bomb carrier ukon kalakip sa mga napilasan bangud nga makaduha ka beses nga nag-pundo ang bus antes nga nakaabot sa siyudad sang Tacurong.
May ginasundan na nga anggulo ang task group apang nagpamalibad anay si Raymundo nga ipakigbahin ini.
Sa subong naka-red alert status ang kapulisan sa bug-os nga Region 12 kun diin ginapatuman man ang hugot nga checkpoint pasulod kag paguwa sa mga strategic areas.
Magluwas diri, ginmandu man ang dugang nga police visibility kag mga mobile patrollers.
Kadungan sini, naghingyo man sang kooperasyon ang kapulisan sa mga pumuluyo nga buligan sila nga magbantay kag mangin vigilante agud nga indi na masulit pa ang insidente.
