KORONADAL CITY- Dako ang kumpyansa sang mga atleta sang Rehiyon 12 nga magapuli ang mga ini bit-bit ang madamo nga bulawan nga medalya para sa Palarong Pambansa 2017 nga kasamtangan nga ginahiwat sa San Jose de Buenavista, Antique.
Sa interbyu sang Bombo Radyo Koronadal sa over-all training manager sang SRAA nga si Henry Dagmil, dako ang salig sini sa mga manughampang halin sa rehiyon 12 ilabi na sa determinasyon sang mga ini sa ila ginahimo nga intensive trainings para sa nasambit nga hinampang.
Samtang ginhatagan punto sini nga ang Palarong Pambansa ang isa ka kritikal nga sporting event rason nga indi lamang kabakod sang lawas ang kinahanglan apang mangin man ang teknik kag ideya nga paga-usaron sang mga atleta sa hinampang.
Samtang sa pihak nga bahin, naghingyo sang pangamuyo kag suporta ang mga atleta halin sa rehiyon 12 nga madinalag-on sila sa mga ginsalihan nga events kag mangin luwas sa tunga sang hinampang.
Ginkalipay naman sang mga atleta kag ni Dagmil ang suporta sang mga LGU’s mga opisyal ilabi na ang suporta sang South Cotabato Provincial Government para sa mga ginakinahanglan sang mga atleta.
