Pagaimbestihan ni Senadora Imee Marcos, chairman sang Senate Committee on Foreign Relations, ang pag-aresto kay dating Pangulong Rodrigo Duterte.
Ginarestar sang mga otoridad si Rodrigo Roa Duterte sang Marso 11 sa Ninoy Aquino International Airport Terminal 3 bangud sa kaso nga krimen batok sa katawhan.
Suno kay Imee Marcos, nga kilala nga kaalyado sang pamilya Duterte, ang ini nga pag-aresto nagdala sang pagkabahin-bahin sang pungsod.
Gina-emphasize niya nga kinahanglan mahibaluan kon ginsunod ang due process kag matiyak nga ginaprotektahan ang legal rights ni Duterte, labi na kay nalakip diri ang Interpol kag International Criminal Court (ICC).
Dugang pa sang senadors, dapat pagatutukan sang Senado ini nga isyu agud protektahan ang hurisdiksyon sang Pilipinas kag klaruhon ang mga regulasyon nga nagapanguna sa mga law enforcement agencies, lakip na ang ila pakig-angot sa international tribunals.
Agud masabtan ang sitwasyon, plano ni Marcos nga pagaimbitahon ang mga opisyal sang Philippine National Police (PNP), Office for Transportation and Security sang Department of Transportation, National Security Council, Civil Aviation Authority of the Philippines, kag iban pa nga resource persons kag witnesses.
Nahinumduman nga napahayag si senadora nga indi siya makapati nga naglab-ot sa pag-aresto ang pag-abot sang anay nga Pangulo gikan sa Hong Kong.
Nabatyagan niya ang kakibot kag pagkasubo kay Duterte, labi na nga tigulang na ini.
Para sa senadora, wala sang may mapuslan ang away sa politika para sa mga nagakinahanglan sang bulig sa pungsod.
Ang imbestigasyon ginplano nga mahitabo sa Marso 20, Huwebes.
