KORONADAL CITY – Nagpalab-ot sang pagkaalarma kag kabalaka ang isa ka concerned citizen sa Bombo Radyo Koronadal may kaangtanan sa suno pa pabaya kag indi hugot nga pagpatuman sang seguridad kag checkpoint pasulod kag paguwa sa siyudad sang Koronadal partikular sa Matulas, Barangay Paraiso.
Suno sa concerned citizen, dismayado siya sang nag agi kaina sang kaagahon sa check point bangud wala man lamang sang pulis nga nagpauntat sa iya ukon nakakita bangud wala sang pulis nga nagatindog sa check point.
Apang, pag abot sa unhan may naagyan ang mga ini nga outpost nga ang nagabantay mga BPATS nga amo ang hugot nga nagapangita sang ID antes pasudlon ang mga motorista.
Suno sa iya, paano na lamang kun may mga terorista nga nag-agi, dako ang posibilidad nga indi makabato ang mga BPATS bangud wala naman sang armas ang mga ini.
Dugang pa sini nga baliskad ang sitwasyon sa nagakatabo bangud sa ginalauman sang mga pumuluyo ang istrikto nga implimentasyon sang No ID No Entry apang wala ini nagakatabo.
Kadungan sini, ginpasiguro ni South Cotabato Police Provincial Director Senior Supt. Franklin Alvero nga hatagan sini sang igtalupangod ang reklamo sang isa ka concerned citizen kun diin gilayon suno pa siya nga magasapol sa mga pulis sa pagpanguna sang chief of police sang Koronadal.
Dugang pa sang opisyal, nga nagahingyo sila sang bulig sa mga force multipliers kasubong sang BPATS agud nga madugangan ang nagabantay sa mga entry kag exit point sang siyudad.
Aminado si Col. Alvero nga indi lamang ini ang una nga beses nga nakabaton sila sang reklamo angot sa ginapatuman nga check point humalin nga ginpatuman ang NO ID, NO ENTRY.
