KORONADAL CITY- Gin-insister ni South Cotabato Governor Daisy Avance Fuentes nga dako ang mangin benipisyo sang rehiyon 12 sa pagbukas sang Ro-Ro trips sa tunga sang Davao-Gensan-Bitung Indonesia.
Nahibaluan nga ang nasambit nga programa ang ginhisgutan nanday Pres. Rodrigo Duterte kag Indonesian Pres. Joko Widodo ang isa ka dako nga oportunidad agud nga maka-import sang produkto ang Mindanao kag mapasanyog ang turismo sa Rehiyon.
Kaangot sini gindugang pa ni Gov. Fuentes nga agud makapulos sang husto ang Rehiyon 12 sa pagbukas sang sea gateway sa Indonesia dapat nga hibaluon anay sang husto sang rehiyon ang mga produkto nga mahimo i-import kag mahimo man i-export sa nasambit nga pungsod bangud halos pareho lang ang mga produkto sang Indonesia kag Pilipinas.
Samtang, nagakadapat man nga hatagan sang solusyon sang duha ka pungsod ang problema sa malapnagon nga pag-atake sang mga pirata sa kadagatan nga isa ka dako nga pamahog sa seguridad.
