KORONADAL CITY – “Isa ka mabuot nga klase sang bata” ini ang paglaragway sang tiyo sang isa ka pulis nga napatay sa vehicular accident sa bahin sang National Highway, Purok 2, Barangay Glamang, Polomolok, South Cotabato.
Sa interview sang Bombo Radyo Koronadal kay Danilo Masula, tiyo ni Pat. Fahad Masula , isa ka responsable kag mapinalanggaon man nga klase ka bata ang nasambit nga pulis sa mga kapamilya, himata kag mga nakakilala sini.
Ginpahayag pa ni Danilo nga tuman pa kasakit sa mga ginikanan ni Fahad ang natabo bangud kahinali lang nga tion.
Sa pagkamatoud, halos kada aga ginahakos sang pinalangga sini nga iloy ang laragway sini nga nagahibi bangud bugtong lang nga bata si Pat. Masula.
Madumduman nga padulong sa General Santos City ang ginamaneho nga salakyan ni Fahad samtang padulong naman sa siyudad sang Koronadal ang isa ka dump truck nga ginamaneho sang isa ka Ronnie Anggot Torino nga naka-head-on collision sini.
Sa kabaskog sang impact, naipit pa si Patrolman Masula sa driver seat kun diin nangin mabudlay ang pagkakas sa iya.
Sa subong, nakahaya na saila puluy-an sa Brgy. Cacub, Koronadal City ang patay nga lawas ni Patrolman Masula, ang katapo sang RMFB 12 nga napatay sa nagluntad nga aksidente sa dalanon sa Brgy. Glamang, Polomolok, SC, sang tinalikdan nga Miyerkules, Oktubre 16, 2024.
Our deepest condolences to the family of Patrolman Fahad 
