May yara sang 52 ka adlaw nga suplay sang lana ang Pilipinas tubtob Abril 21, suno sa Malacañang.
Suno kay Palace Press Officer Claire Castro, ginpanindugan ni Presidente Ferdinand Marcos Jr. nga dapat indi mauntat ang suplay sang krudo kag mga produkto nga petrolyo agod malikawan ang stagnation kag mas pa nga pagsaka sang inflation bangud sa kinagamo sa Middle East.
Sa ikaapat nga miting sang UPLIFT Committee nga ginpangunahan sang Presidente, ginreport nga nakaabot na sa 471,000 ka bariles sang petrolyo ang nadeliver sa pungsod, samtang may ginalauman pa nga 1 milyon ka bariles nga order.
Sa pihak nga bahin, masobra 977,000 ka PUV drivers ang nakabaton sang bulig, kag 373,000 ang nakabenepisyo sa fuel subsidy program.
Ginpahayag man snag Palasyon nga ginapadasig ang 22 ka renewable energy projects nga may kapasidad nga 1,471 megawatts agud masiguro ang stable nga suplay sang kuryente.
Dugang pa, 86.89% sang 665 ka ahensya sang gobyerno ang nagsunod sa energy-saving measures, samtang 2,933 ka ahensya kag entidad ang nagapatuman sang flexible work arrangements agud makakinot sa petrolyo kag kuryente.
