Magaduso ang Pilipinas sang panibag-o nga diplomatic protest kontra sa China pagkatapos sang hungod nga pagbangga sang China Coast Guard (CCG) sa barko sang Bureau of Fisheries and Aquatic Resources (BFAR) nga BRP Datu Pagbuaya sa sulod sang iya territorial waters sa Pag-asa Island sang aga sang Domingo, Oktubre 12. Ginkumpirma ni DFA spokesperson Angelica Escalona nga magapadala sang protesta ang gobyerno sang Pilipinas kontra sa China tungod sa pinakabag-o nga agresibo nga aksyon sini nga nagdulot sang bahagya nga kahalitan sa BRP Datu Pagbuaya.
Una nga ginreport sang Philippine Coast Guard, ginbombahan anay sang Chinese vessel sang water cannon antes sini ginbangga ang BRP Datu Pagbuaya.Ginapakamalaot gid sang gobyerno kag sang National Maritime Council ang insidente, nga gintawag nila nga ilegal kag makatalagam nga aksyon kontra sa soberanya sang aton pungsod.
Amo na ini ang pinakabag-o nga insidente sang agresyon sang China pagkatapos sang water cannon attack sa Bajo de Masinloc sang Setyembre 16 nga nagresulta sa pagkasamad sang isa ka Pilipino. Base sa DFA, naglab-ot na sa 241 ang ginpasa nga diplomatic protest sang Pilipinas kontra sa China halin Hulyo 2022 sa idalom sang administrasyon ni Marcos.
