(Photo ctto)
KORONADAL CITY- Nagpakatig-a tubtob subong ang pila ka mga nagapanag-iya sang mga establisemento nga naguba sa asud-asod nga linog partikular na sa North Cotabato nga idemolish ang mga edifisyo nga indi na pwede nga usaron pa.
Nahibaluan nga pila sa mga totally damaged nga edifisyo nga ginapademolish amuh ang Eva’s hotel sa Kidapawan City apang base kay Kidapawan City Mayor Joseph Evangelista naghangyo ang tag-iya sang building nga hatagan pa sila sang pila ka semana nga extension agud marekober ang kagamitan nga yara sa sulod sang hotel.
Samtang sa bahin naman sang South Cotabato partikular na sa Koronadal, madumduman nga 40 ka mga edifisyo sa syudad nga ginarekomendar ni Mayor Eliordo Ogena nga idemolish na bangud sa mga litik kag kadaan sang mga ini nga indi luwas nga usaron.
Kaangot sini, isa sa mga problema sang mga City Engineers kag Architects nga nagpatigayon sang inspeksyon amuh ang wala sila ginatugutan nga magsulod sa mga edifisyo sang mga tag-iya apisar magpakilala pa sila nga mga taga gobyerno.
Bangud sini, nagakabalaka ang City government nga basi mabutang sa peligro ang kabuhi sang mga naga istar ukon mga empleyado sa sulod sang edifisyo.
