KORONADAL CITY- Nagapadayon sa karon ang assessment sang Municipal Disaster Risk Reduction Management Council sang Surallah, South Cotabato makaligad ang pagpanalasa sang buhawi sa nasambit nga banwa.
Nahibaluan nga nakapagkit sang mabaskog nga hangin sa bug-os nga banwa kag tuman nga pag-ulan nga ginlakipan pa sang pag-ulan man sang kasubong ka dako sa liso sang mais nga ice.
Bangud sa nasambit nga panghitabo, naglab-ot sa 4 ka puluy-an ang naguba sa Brgy. Dajay Surallah, South Cotabato kun sa diin suno kay kapitan Christopher Lazo apektado man ang mga talamnan kag natumbahan man sang puno sang kahoy ang isa ka buluthuan.
Temporaryo naman nga nagapabilin sa ila mga himata ang mga pamilya nga nagubaan sang puluy-an.
Kaangot sini, temporaryo nga nadulaan man sang suplay sang kuryente ang banwa apang gilayon na naman nga nabalik ang suplay sini.
Samtang kaangot sini, suno naman kay Surallah MDRRM Officer Leonardo Ballon padayon pa ang ginapatigayon nga clearing operations sa iban pa nga mga barangay kasubong sang Naci, Lamsugod kag Libertad kun sa diin may mga nagkalatumba nga puno sang kahoy.
