Target sa karon sang Philippine Coast Guard (PCG) nga maging pinakamakusog nga coast guard sa bug-os nga Southeast Asia sa lima tubtob pito ka tuig.
Ginalauman sang PCG nga magkadugang sang 46 nga bag-o nga mga barko sa mga masunod nga tuig.
Suno kay PCG Commandant, Admiral Ronnie Gil Gavan, gin-aprubar na sang administrasyon ni Marcos ang pagbakal sang lima ka 97-meter cutters halin sa Japan.
Magluwas sini, apprubado man ang 40-unit sang 35-meter vessel halin sa France.
Isa ka 60-meter cutter man ang plano nga himuon sa isa ka shipyard sa Cebu.
Magluwas sa 46 nga bag-o nga barko para sa PCG, ginalauman sang ahensiya ang pagbaylo sang Bureau of Fisheries and Aquatic Resources (BFAR) kag Philippine Red Cross sang ila palakat sa PCG.
Suno sa opisyal, pamaagi sa suporta sang administrasyon sa karon posible nga malab-ot ang ginalauman nga pinakamakusog nga coast guard sa Southeast Asia sa mga masunod nga tuig kag mapabilin ang mas malapad nga pagpatrolya sa karagatan nga sakop sang Pilipinas.
