KORONADAL CITY – Pagarespetuhon sang pamilya ni Fr. Teresito “Chito” Suganob anuman ang mangin desisyon ni Pangulong Rodrigo Duterte sa nangin panawagan sang ila nga himata kadungan sang naguwa nga video kahapon.
Inia ng ginpahayag ni Boyet Suganob, utod ni Fr. Chito sa interbyu sang Bombo Radyo Koronadal.
Suno kay Boyet, nahangpan nila nga may kaugalingon nga panindugan kag desisyon ang pangulo sang pungsod nga indi lamang ikonsiderar ang kaluwasan nanday Father Chito kag sang masobra 200 pa ka mga bihag kundi mangin ang kaluwasan sang bug-os nga pumuluyong Pilipinhon.
Indi mapahayag sang pamilya Suganob kun kaugalingon nga panawagan ni Fr. Chito ang yara sa video ukon ginpilit lamang ini sang Maute terrorist.
Apang, kun siya ang pamangkuton indi magpangduha-duha nga ihalad ni Fr. Chito ang kabuhi sini para sa kaluwasan sang mga kaupdanan sini bangud sadto pa man makabig na ini nga “peace maker”.
Sa pagkamatuod, siya ang nagarepresentar sa simbahang Katoliko sa mga peace negotiation sa Marawi kag iban pa nga parte sang Lanao del Sur.
Sa subong, dugang nga apela sang pamilya Suganob nga pabaskugon pa ang pangamuy para sa kaluwasan ni Fr. Chito kag mga kaupdanan sini bangud nagapati sila sa power of prayer.
Samtang, wala ginpanginwala ni Boyet nga nakaangkon sila sang paglaum sa paguwa sang video bangud napamatud-an nila nga buhi pa ang ila utod.
Nahibaluan nga sang Abril 7, 2017 pa ulihi nga nakapauli sa banwa sang Norala, South Cotabato si Fr. Chito.
