Pumalag ang Malacañang sa pahayag ni Senador Alan Peter Cayetano nga ginbalibaran kuno ni Pangulong Ferdinand Marcos Jr. ang iya panukala nga maghatag sang ₱10,000 nga ayuda sa mga pamilyang naapektuhan sang COVID-19 pandemic.
Sa mensahe sa media, ginpahayag ni Palace Press Officer Claire Castro nga magapresentar ang Malacañang sang ebidensiya agud pamatud-an nga indi matuod ang alegasyon sang senador.
Ini kasunod sang Facebook Live ni Cayetano kun sa diin gin-angkon niya nga wala gin-aprubahan ni Pangulong Marcos ang iya ginapanukal nga ayuda sang 2021 tubtob sa pagsulod sang 2022.
Suno kay Castro, padayon nga nagapakalat si Cayetano sang mga alegasyon nga wala sang matuod nga basehan kag nagahimo sang kontrobersiya imbes nga batunon ang iya kaugalingon nga responsibilidad.
Madumduman nga ginbuyagyag ni Cayetano ang isyu matapos ipahibalo sang gobyerno ang bag-o nga ₱12,000 nga ayuda para sa kapin pito ka milyon ka imol kag low-income nga mga Pilipino nga naapektuhan sang krisis sa langis bangud sang tensyon sa Middle East.
