KORONADAL CITY – Dako ang mabulig sang Moro Islamic Liberation Front (MILF) sa pagtapna sang Maute terror group nga nagpatigayon sang pag-atake sa siyudad sang Marawi nga nagresulta na sa pagkapatay sang 100 nga ginalakipan sang mga terorista, suldado kag mga sibilyan.
Ini ang reaksiyon ni 33rd IB Philippine Army Battalion Commander Lt. Col. Harold Cabunoc sa interbyu sang Bombo Radyo Koronadal.
Suno kay Cabunoc, mas mangin epektibo ang pag-ubos sa mga terorista sa Mindanao kun magbulig ang MILF kag magpatigayon man sang operasyon batuk sa Maute.
Suno pa sa iya, mas magabaskog ang pwersa sang gobyerno kun maghiliusa ang tanan.
Sa bahin naman sang mga suldado, magasunod sila sa anuman nga mandu gikan sa higher headquarters.
Samtang, aminado man si Cabunoc sa balita nga may mga menor de edad nga ginagamit ang Maute sa pakig-gyera sa mga suldado apang mabudlay ini nga ma-identify sa tunga sang inaway.
Gin-insister pa sini nga paglapas sa layi ang ginahimo sang mga ini bangud kun pagabasehan ang International Law on Conflicts responsibilidad sang mga suldado nga protehiran ang mga kabataan.
Makaluluoy suno pa ang mga menor de edad bangud sila ang biktima man sang pagpang-into sang mga terorista.
