Mas ginpahugot pa ang pagbantay sang talatapan sang Brgy. New Iloilo sa mga residente sang nasambit nga lugar matapos naka-eksperyensyar sang duwa ka attempted nga pagpangholdap nga nagluntad sa mga Barangay sang New Iloilo kag Libas, Tantangan, South Cotabato, kagab i, adlaw sang Martes, September 3, 2024.
Sa exclusive interview sang Bombo Radyo Koronadal kay Punong Barangay Benhur Peñol sang Brgy. New Iloilo, padayon ang ila monitoring kag ginahimo nga tikang agud nga matapna ang insidente sang pagpangawat kag presensya sang motornapping sa mga kaiping nga area. Mas ginpasangkad pa ang curfew para sa mga menor de edad agud hindi mabiktima sang mga malain nga biktima.
Ginpasigurado man sang nasambit nga opisyal nga consistent ang coordination sang ila talatapan sa mga kapulisan angot sa nagakaranabo saila nga AOR.
Madumduman nga base sa panaysayon kay Vincent Lagos, utod sang biktima, halin sa eskwelahan ang iya utod nga si alyas Jomar kag pinsan sini nga si alyas Bobet kag papauli na kuntani saila nga balay sang hinali nga ginpundohan ini sa madulom nga parte sang dalan sang isa ka LALAKI nga naga-maneho sang Bajaj nga motorsiklo, nakauba ukon naka-topless, kag nakasuksok sang kalo
Gintayaan sang malaba nga armas ang utod sini samtang nagdalagan naman ang pinsan sini.
Wala pa nakuntento ang holdaper, ginlagas suno pa sini ang pinsan ni Lagos.
Sa dugang, may yara nagpundo nga salakyan rason nga na-delatar ang motibo sini sa mga biktima.
Maswerte naman nga wala may nakuha ang nasambit nga holdaper sa mga biktima.
Nakapalagyo naman ang suspek kag may biktimahon man tani nga isa ka indibidwal sa Brgy. Libas sang nasambit nga banwa apang nangin unsuccessful man ini.
Nagapanawagan naman si Peñol sa tanan nga mangin mahinalungon kag mangin alerto sa palibot.
