Ginpahayag sang isa Human Rights Advocate nga mahimo mangin dugang nga security measure ang transparent bags sa mga buluthuan bangod mas mahapos makita kon may ginadala nga armas. Sa interview sang Bombo Radyo Koronadal ginpahayag ni Lexi Acosta, nga indi ini dapat mangin nagaisahanon nga solusyon sa school violence.
Suno kay Acosta, kinahanglan man tutukan ang mas madalom nga isyu pareho sang gun control, gun ownership, extremist influence kag mental health. Ginpahayag niya ang kabalaka sa online communities nga nagapromote sang violent kag sadistic content, lakip ang pag-glorify sa mga school shooter kag sobra nga interes sa gore kag violent crimes. Mas nagadugang, suno sa iya, ang risgo bangod sa mahapos nga access sang kabataan sa social media kag iban pa nga online platforms, diin mahimo sila ma-expose sa online friendships kag content nga nagapadulong sa extremist ideologies.
Gin-awhag ni Acosta ang mga ginikanan nga mangin mas alerto sa warning signs kag mas involved sa kabuhi sang ila mga kabataan. Indi lamang materyal nga panginahanglan ang importante, kundi pati gugma, respeto, paghangop kag suporta sa ila mental kag emosyonal nga kaayuhan. Para kay Acosta, ang pagprotekta sa kabataan indi lamang nagadepende sa physical security. Kinahanglan man sila pamatian, atipanon kag hatagan sang lig-on nga suporta agud malikawan ang mas daku nga risgo sa sulod kag guwa sang buluthuan.
