KORONADAL CITY – Indi suportado ni South Cotabato Governor Daisy Avance Fuentes ang plano sang Duterte administration nga ilakip ang Moro Islamic Liberation Front (MILF) kag Moro National Liberation Front (MNLF) sa aktuwal nga operasyon sang gobyerno sa pakig-away batuk sa ISIS linked terror group nga Maute.
Suno sa gobernadora, magapalala lamang sang sitwasyon labi na nga rebelde nga grupo man ang mga ini kun diin sa oras nga magpartisipar sila daw kasubong nga nagakahulugan lamang nga indi na masarangan sang gobyerno nga makigbakbakan sa terorista nga grupo.
Dugang pa sini nga mas maayo na lamang nga magbulig ang mga ini paagi sa pagpauntat sang ila mga myembro nga magpartisipar sa terorista nga grupo nga kasamtangan nga nagatuga sang kinagamo sa Mindanao.
Samtang, suportado naman sang gobernadora ang deklarasyon ni President Rodrigo Duterte sa deklarasyon sang Martial Law agud nga maluwas ang Mindanao sa kamot sang mga terorista nga grupo.
