-- ADVERTISEMENT --

Ginpatuman sang national government ang Pag-Abot Program nga nagatuyo nga mahatagan sang oportunidad ang mga pamilya kag indibidwal nga nagaestar sa higad sang mga dalanon nga makaguwa sa ila mabudlay nga kahimtangan kag makaangkon sang mas maayo nga kabuhi.

Sa interview sang Bombo Radyo Koronadal, ginpahayag ni Ryan D. Balanza, Social Welfare Officer IV kag Chief sang Innovations Division, nga gintukod ang nasambit nga programa agud mahatagan sang tsansa ang mga pamilya nga nagaistar sa mga higad sang dalan nga makabaton sang nagakaigo nga suporta kag bulig halin sa gobyerno.

Paagi sa programa, ginatinguhaan nga matubtuban ang mga panginahanglanon sang mga benepisyaryo kag mahatagan sila sang oportunidad nga makabangon kag makapagsugod liwat sa mas maayo kag mas sigurado nga palangabuhian.

Dugang pa, kabahin sang katuyuan sang Pag-Abot Program ang paghatag sang mas maayo nga kahimtangan sa pagpangabuhi sa mga indibidwal kag pamilya nga yara sa delikado kag mabudlay nga sitwasyon, paagi sa pagpalapit sa ila sang mga serbisyo kag programa sang gobyerno.

Pinaagi sini, ginapaabot nga indi lamang temporaryo nga bulig ang mabaton sang mga benepisyaryo kundi oportunidad man para sa mas malungtaron nga pagbag-o sang ila kahimtangan sa kabuhi.