-- ADVERTISEMENT --

Naghatag sang kasubo sa basketball community ang balita sang pagtaliwan sang anay PBA star nga si Peter June “PJ” Simon, sa edad nga 46 anyos matapos matumba kag madulaan sang animo samtang nagahampang sa isa ka exhibition game sa Davao City sang Biyernes, Nobyembre 20.

Suno sa mga report, nagpahuway anay si Simon sa kilid sang basketball court matapos ang pila ka minuto nga hampang, apang wala madugay nadulaan ini sang animo.

Gilayon siya nga gindangat sa San Pedro Hospital sa Davao City agud mahatagan sang bulig medikal, apang wala na siya nakaluwas.

Mas kilala sa iya mga bansag nga “The Scoring Apostle” kag “SuperSub,” kun sa diin nangin importante nga bahin si Simon sang Purefoods franchise sa sulod sang 17 ka season sa Philippine Basketball Association (PBA).

Sa iya malawig nga karera, nakabulig siya sa team nga makakuha sang walo ka kampeonato, lakip na ang maragtas nga Grand Slam sang 2014.

Walo ka beses man siya nga napili bilang PBA All-Star.

Nagsugod ang basketball journey ni Simon sa Davao Eagles antes siya nakasulod sa PBA sang 2004.

Samtang, nagretiro siya sa propesyonal nga basketball sang 2020, kag bilang pagkilala sa iya kontribusyon sa koponan, ginretiro sang franchise ang iya jersey number 8.

Bisan matapos ang iya propesyonal nga karera, nagpabilin ang iya gugma sa basketball.

Nagpadayon siya sa paghampang sa Mindanao kag sang 2024 kag nangin bahin man siya sang Pilipinas Super League regional program nga nagasuporta kag nagabulig sa mga pamatan-on nga nagahandum nga mapauswag ang ila abilidad sa basketball.