KORONADAL CITY- Masakit nga ginsaysay sa Bombo Radyo sang isa ka Overseas Filipino Worker (OFW) nga Domestic Helper sa Dammam , Kingdom of Saudi Arabia ang iya kaagi bangud nag masakit ini kag ginmaltratar pa sang iya nga kaugalingon nga amo.
Sa interview sang Bombo Radyo Koronadal, kay Ms. Charmie Doming, 27 anyos, may asawa kag taga Barangay Lamhaku, T’boli , South Cotabato, ginpahayag sini nga luyag na niya magpuli na sa ila nga banwa bangud mabudlay na ang iya nga kahamtagan makaligad nga nagmasakit kag pilit pa sa gihapon nga ginapatrabaho sang iya nga mga amo kag ginbaligya pa sa iba nga amo.
Ginpahayag pa sini nga 4 pa lamang ini ka bulan nga naga trabaho sa luwas sang pungsod apang naka-ekperyensya na siya sang pagmaltratar sa diin ginkulong ini sa sulod sang iya nga kwarto kag wala ginpainom kag gin pakaon kag napilitan na lamang ini nga inomon ang tubig sa banyo para madula lamang ang iya nga kauhaw.
Sa subong naga pasalamat gid si Doming sa madasig nga pag-tugun sang Marinduquena International Manpower Services, recruitment agency diri sa Pilipinas ang iya nga hingyo kag daw malapit na ini nga makapuli sa ila banwa.
