KORONADAL CITY – Magapadayon ang hugot nga pagpatuman sang “No ID, No Entry” sa mga check points pasulod kag paguwa sa siyudad sang Koronadal agud masiguro nga luwas sa kapahamakan ang tanan nga mga pumuluyo.
Ini ang ginpasiguro ni PSSUPT. Franklin Alvero, provincial director sang South Cotabato sa interbyu sang Bombo Radyo Koronadal.
Kasunod ini sang naguwa nga impormasyon nga may nakasulod nga suno pa napulo ka mga Maute members sa probinsiya sang South Cotabato kag nakahanda nga maghimo sang kalakasan.
Apang, suno kay Alvero, padayon pa ang ginahimo nga validation kag beripikasyon sang mga otoridad sa nasambit nga balita kag indi dapat nga magpanic ang mga pumuluyo sa baylo mag-doble halong kag vigilante sa tanan nga oras.
Dugang pa sang opisyal, kooperasyon sang tanan sa ginapatuman nga curfew kag lockdown sa Koronadal City ang kinahanglan sa ginapatuman nga curfew hour kag hugot nga checkpoints.
Gin-insister man sang opisyal nga ang nasambit nga tikang ang kabahin sa gihapon sang ginapatuman nga Martial Law sa bug-os nga isla sang Mindanao rason nga ginlaygayan sini ang mga sibilyan nga dapat magsunod sa otoridad agud nga malikawan ang anuman nga problema labi na sa mga byahero.
Kadungan sini, nagpanawagan ang opisyal sa tanan nga magdala sang Identification Cards (ID) agud nga may mapresentar sa mga otoridad labi na karon sa gab-i nga magasugod ang curfew sa siyudad sang Koronadala alas-11 sang gab-i tubtob alas-4 sang kaagahon.
