KORONADAL CITY– Ginpaulanan sang bala patay sang isa ka pulis ang isa ka mister bangud lamang suno pa sa wala sini pagsoksok sang bayo sa Brgy. San Isidro, Koronadal City.
Ginkilala ang biktima nga si Renato Los Bañes samtang ang pulis ginkilala kay PO3 Jan-Jan Ribete nga nakadestino sa Lutayan,Sultan Kudarat PNP.
Kaangot sini,personal nga nagpadulong ang misis sang biktima nga si Ginang Nenita Los Bañes sa waragwagan sang Bombo Radyo Koronadal agud ipanawagan sa nasambit nga pulis nga magpakita na kag ginhangkat pa sini nga magpadrug test.
Sa salaysay ni ginang Los Banes, gikan suno pa sa birthday party ang iya bana kag sang papauli na ini gulpi na lamang siya nga ginpaulanan sang bala sang pulis.
Ginkaakig naman sini ang brutal nga pagpatay sa bana makaligad mahibaluan nga walo ang igo sini.
Base sa isa ka witness, ginsita sang Pulis si Los Bañes bangud wala ini sang soksok nga bayo kag may dala nga kahoy para sa mga ido apang bangud sa impluwensya sang makahulubog nga ilimnon wala man nagpapierde ang biktima kag ginpahayag nga wala ini nahadlok sa pulis kag nagpapuli na.
Apang gilayon ini nga ginsugod sang pulis kag ginpaulanan sang bala.
Gindala pa ang biktima sa South Cotabato Provincial hospital apang gindeklarar nga Dead on Arrival.
