KORONADAL CITY- Nagapadayon ang Hot Pursuit Operation sang militar batuk sa mga notoryus bombers sa banwa sang Midsayap, North Cotabato.
Sa ekslusibo nga interbyu sang Bombo Radyo Koronadal kay 6th Infantry Division Philippine Army spokesperson, Army Captain Arvin Encinas, ini ang kasunod sang nagluntad nga engkwentro sa tunga sang combined troops sang 34th Infantry Battalion kag Midsayap Municipal Police sa grupo nga ginapamunuan sang notorious bomber nga si Mama Macalimbol sang ISIS-inspired Group nga Dawlah Islamiyah sa Sitio Mangga, Brgy. Tumbras Midsayap, North Cotabato.
Nagdugay ang kinagamo sang masobra 5 ka minuto kun sa diin nagpalagyo ang mga target sa surudlon nga bahin sang Brgy. Tumbras kun sa diin nakarekober sang armas kag mga bala.
Nahibaluan nga ang grupo ni Macalimbol ang isa sa mga ginbansagan nga yara sa likod sang pagpasigabong sa Central Mindanao.
