KORONADAL CITY- Nag-ibwal ang panibag-o nga encounter sa tunga sang militar kag sang Bangsamoro Islamic Freedom Fighters ukon BIFF sa Brgy. Tukanalipao, Mamasapano, Maguindanao.
Nahibaluan nga nagpatigayon sang combat clearing operation ang Alpha Company sang 40th Infantry Battalion sa nasambit nga barangay sang maka encounter nila ang yara sa 20 ka ma armado nga BIFF nga nagdugay sang 15 minutos.
Suno sa mga sibilyan sa nasambit nga lugar, nakit-an nila nga may mga pilason sa bahin sang BIFF nga gilayon nga gindala sang mga kaupdanan sini.
Samtang sa operasyon nakarekober ang militar sang nagkalain-lain nga mga armas nga ginakabug-usan sang 2 M14 rifles, 2 Garand rifles, 1 M16 kag iban pa.
Suno naman kay 6ID P A spokesperson Army Captain Arvin Encinas, nagapadayon sa gihapon ang ila focused and intensified military operations laban sa local terror groups sa Central Mindanao ilabi na nga ginalauman ang retaliation sang rebelde nga grupo makaligad mapatay ang notoryus bomber sang BIFF nga si Norodin Taib nga isa sa mga yara sa likod sang Isulan bombings.
