KORONADAL CITY- Nagapanawagan si Moro Islamic Liberation Front vice chair for political affairs Ghadzali Jaafar sa mga nagakontra sa ginaduso nga Bangsamoro Organic Law nga respetuhon kun anuman ang mangin resulta sang ginpatigayon nga piniliay.
Sa ekslusibo nga interbyu sang Bombo Radyo Koronadal kay Jaafar, 85% suno pa sa mga taga-Cotabato ang nagapabor sa BOL samtang pila sa mga nabilin nga porsyento ang kabahin na lamang sang oposisyon kasubong ni Cotabato City Mayor Cynthia Guiani-Sayadi kun sa diin kumpiyansa ini nga indi ini mangin rason agud makaangkon sang failure of election.
Sa pihak nga bahin, kaangot sa insidente sang pagpanghaboy sang duha ka Granada sa balay sang hukom sa siyudad nga si Judge Angelito Rasalan nga utod ni Anecito Rasalan ang Executive Secretary ni Mayor Sayadi, kinahanglan anay nga maghulag ang imbestigasyon sang mga otoridad antes magpaguwa sang espekulasyon labi na kag ginaangot sa plebisito ang nasambit nga pagpasigabong.
Madumdoman nga una nga ginbuyagyag sa Bombo Radyo Koronadal sang kampo ni Sayadi ang alegasyon nga nakabaton suno pa sila sang mga pamahog halin sa kampo sang MILF agud magsuporta sa BOL.