KORONADAL CITY- Arestado ang pila ka myembro sang rebelde nga grupo sa ginpatigayon nga anti-illegal drugs operation sang gintingob nga pwersa sang PDEA 12, nagkalain-lain nga unit sang Philippine National Police kag 7th Infantry Battalion Philippine Army sa probinsya sang North Cotabato.
Nahibaluan nga naglab-ot sa 9 ka search warrant ang gin-implementar sang mga otoridad batuk sa drug group members kun diin arestado sa operasyon sa Brgy. Poblacion sanday Neaisa Magoncia Guerrero alyas Naning Magoncia, Jimuel Magoncia Narvacan, Toto Dataya Pedtaman , Mary Grace Guerrero Magoncia, Perla Guerrero Valdez, kag Roel Iyas Cais kun diin nakuha sa posisyon sang mga ini ang 5 gramo sang suspected shabu nga may estimated value nga P37,000, drug paraphernalia, matag-as nga kalibre sang armas luthang kag mga motorsiklo.
Sa piha nga bahin, sa ginpatigayon man nga operasyon sa Brgy. Kayaga, arestado man sanday Edgardo Sarmiento Bacana , Murphy Amerkhan Bacana kag Mayet Amerkhan Bacana kun diin nakuha sa posisyon sang mga ini ang masobra 10 gramo sang suspected shabu kag mga drug paraphernalia.
Sa nasambit nga operasyon natukiban nga sanday Magoncia kag Egdardo Bacana ang mga myembro sang organisado nga grupo sang mga durugista nga nagaoperar sa Kabacan, Carmen, Matalam, M’lang kag Tulunan, North Cotabato.
Nahibaluan nga ang maghimata nga Bacana ang ginapatihan nga myembro sang Moro National Liberation Front (MNLF) samtang si Pedtaman ang myembro sang Moro Islamic Liberation Front 108th Base Command.
