May mabaskog nga indikasyon nga wala pa nakagwa sa Pilipinas si Senador Ronald “Bato” dela Rosa.
Suno kay National Bureau of Investigation (NBI) Director Melvin Matibag, may yara sila sang ginasundan nga impormasyon ukon lead kaangot sa posible nga nahamtangan sang senador.
Paathag sang NBI Director, mabudlayan nga makagwa sa Pilipinas si dela Rosa bangud yara sa 132 ka pungsod ang miyembro sang International Criminal Court (ICC).
May ginapangatubang karon nga arrest warrant si dela Rosa gikan sa ICC matapos hingalanan bilang isa sa co-perpetrators kuno ni anay Pangulong Rodrigo Duterte sa kaso nga crimes against humanity bangud sa war on drugs sang nakalipas nga administrasyon.
Samtang, liwat nga ginsiling ni Matibag nga wala pa sila sang nabaton nga dugang nga arrest warrant gikan sa ICC.
