KORONADAL CITY – Yara sa ginabulubanta 300 ka pamilya sa gihapon ang nagapabilin sa mga evacuation centers makaligad ang engkwentro sa tunga sang Moro Islamic Liberation Front ukon MILF kag Bangsamoro Islamic Freedom Fighter ukon BIFF sa Shariff Saydona Mustafa, Maguindanao.
Ini ang ginpahayag ni Major Arvin Encinas, spokesperson sang Western Mindanao Command ukon WESMINCOM sa interbyu sang Bombo Radyo Koronadal.
Suno kay Encinas, halos katunga pa sa mga nagbakwit ang nagapabilin sa luwas nga lugar bangud sa kahadlok nga liwat nga mak-angkon sang engkwentro.
Apang ginpasiguro man sang militar nga ginatutukan nila ang sitwasyon sa Sitio Tinulusan, Brgy Dasawao sa nasambit nga banwa agud nga indi na maka-angkon sang spill over kag malamita ang mga inosente nga sibilyan.
Samtang ginkumpirmar man ni Major Encinas nga napatay ang isa ka ginapatihan nga myembro sang Bangsamoro Islamic Freedom Fighters ukon BIFF makaligad nga maglikaw kag magpalagyo sa isa ka checkpoint sa Barangay Malangit, sa Pandag, Maguindanao.
Suno kay Encinas, sa baylo suno pa nga magpondo ang suspek sa checkpint sang CAFGU Active Auxiliary, naglikaw pa ini sa mga otoridad rason nga ginbantayan ini sa iban pa nga checkpoint.
Bangud sini, napilitan ang mga otoridad nga magpalupok sang armas kun sa diin ginbawian sang kabuhi ang BIFF Member nga si Kaliga Usman Kamsa.
Narekober sa suspek ang 2 ka granada.
Ginhatagan punto man ni Encinas nga ang nasambit nga hitabo ang kabahin sang law enforment operations sang militar kag PNP batuk sa BIFF kag iban pa nga lawless elements.
