KORONADAL CITY – Ginabulubanta nga magalab-ot sa masobra 30 gold medals ang target nga makuha sang mga atleta gikan sa Rehiyon 12 sa palaabuton nga Palarong Pambansa 2017 sa Antique.
Ini ang ginpahayag ni DepEd-12 sports coordinator JoJo Duhilag sa interbyu sang Bombo Radyo Koronadal.
Suno kay Duhilag, mas agresibo subong kag nakapreparar ang mga athletes kun ikumparar sang nagligad nga tuig.
Ginalauman naman nga makakuha sang gold medal ang rehiyon sa taekwondo, gymnastic, boxing, athletic, archery, table tennis, wushu, billiard at iba pang mga event.
Magluwas diri, pila ka mga group events man nga mahimo makaangkon sang gold medals amo ang baseball sa elementary level, volleybal kag iban pa.
Nahibaluan nga yara na sa Antique sa subong ang kabug-usan nga delegasyon sang Region 12 nga naglab-ot sa masobra 700 lakip na ang mga athletes, coaches, chaperons kag mga opisyal.
Kadungan sini, ginhingyo man sang opisyal nga ipangamuyo ang bug-os nga delegasyon sang SOCSKSARGEN agud nga mapasaka ang ranking sa Palarong Pambansa 2017.
