KORONADAL CITY- Nagapati si Commission on Human Rights 12 Regional Director Erlan Delvio nga wala na sa suno pa sang basehan nga ipadayon pa ukon palawigon ang Martial Law sa isla sang Mindanao.
Sa ekslusibo nga interbyu sang Bombo Radyo Koronadal kay Regional Director Deluvio nga kontrolado na suno pa ang sitwasyon sa rehiyon kag wala na sang rebelyon nga nagaluntad kag ang mga napagkit nga serye sang pagpamomba ang isolated cases lamang.
Kaangot sini luwas sa Martial Law Extension, nagakadapat man nga matutukan ang napagkit nga bayolasyon suno pa sang pila ka mga katapo sang gobyerno sa idalom sang Martial Law kag isa na dire ang resulta sang ila imbestigasyon nga liable suno pa ang 2 ka mga army officers nga sanday 33rd IB commander Lt. Col Harold Cabunoc kag anay 27th IB commander Lt. Col Benjamin Leander sa pagpatay sa 7 myembro sang T’boli Manobo nga ginabug-usan nanday Datu Victor Danyan Sr. sa Sitio Datal Bong Langon, Brgy. Ned Lake Sebu South Cotabato sang Disyembre 3, 2017.
Nahibaluan nga sa karun ginahulat na lamang ang opisyal nga statement sang mga gina akusaran nga military officers sa ginpagwa nga resulta sang imbestigasyon sang CHR.
Samtang sa pihak nga bahin pabor naman si Maguindanao Gov. Esmal “Toto” Mangudadatu sa Martial Law extension bangud nakabulig suno pa ini sa pagpugong sa mga terorista sa pagpalapnag sang kinagamo kag nagsirbe ini nga proteksyon para sa mga investors sa rehiyon.
