Gindepensahan sang Malacañang ang pag-appoint kay anay Senador Manny Pacquiao bilang bag-o nga lead convenor sang National Anti-Poverty Commission, bangud sa iya personal nga eksperyensya sa kaimulon kag madugay na nga pagbulig sa mga imol.
Ginpahayag ni Palace Press Officer Claire Castro nga kabahin sa konsiderasyon sa pagpili kay Pacquiao ang iya pagkilala sa kahimtangan sang mga yara sa laylayan sang sosyedad kag ang iya handum nga makabulig sa mga nagakinahanglan.
Madumduman nga nagpanumpa na kay President Ferdinand Marcos Jr. si Pacquiao bilang NAPC Secretary kag lead convenor.
Panguna nga katungdanan sang ahensya ang pagkoordinar sang mga polisiya kag programa sang gobyerno para sa pagbuhin sang kaimulon, ilabi na para sa mga basic sector.
Gintal-usan ni Pacquiao si Lope Santos III bilang lead convenor sang National Anti-Poverty Commission.
Ginpahayag ni Castro nga wala naghatag ang Malacañang sang rason sa pagbag-o sang pamuno sang komisyon.
