KORONADAL CITY – Personal nga pagabisitahon sang isa ka Maguindanawon nga nagdaug “Mr Culture World 2017” ang mga bakwit sa Marawi City agud maghatag sang inspirasyon kag makita ang ila sitwasyon didto antes siya magatulak sa pungsod Indonesia.
Sa eksklusibo nga interbyu sang Bombo Radyo Koronadal sa 23 anyos nga si Al-Hakam Reggie Dimalanas, ginpahayag sini nga pagausaron niya ang iya nga titulo agud nga manawagan sang bulig sa bug-os nga kalibutan agud makatipon sang pondo nga igahatag sa mga kababayan nga naipit sa giyera.
Suno kay Dimalanas, nahibaluan niya sadto pa man nga may mga ginapakigbato na ang mga utod nga Muslim apang indi suno pa sila dapat nga magpagamit sa mga ISIS ukon mga terorista agud makapanakit sang isigkatawo.
Rason nga sa iya nga pagdaug, ginahalad niya ang korona sa mga kababayan sa Autonomous Region in Muslim Mindanao (ARMM) ilabi na sa mga biktima sang Marawi siege nga naeksperisniyahan nga kabudlay.
Mangin instrumento man suno pa siya agud nga makaangkon sang kalinong sa Mindanao paagi sa pag-awhag sa mga utod nga Muslim nga mangin kalmado kag huna-hunaon ang kaayuhan sang tanan.
Indi man malipatan ni Dimalanas nga magpasalamat sa mga taga-Mindanao sa suporta nga ginhatag sa iya sa pagpartisipar sa nasambit nga kompetisyon.
Si Dimalanas ang nagikan sa Buluan, Maguindanao, nga ginkilala bilang Mr. Culture World 2017.
