KORONADAL CITY – Ginkalipay sang Banga LGU kag Philippine Red Cross ang pagsabat sang ila mga pumuluyo sa espesyal nga bloodletting activity sang Bombo Radyo Philippines nga Dugong Bombo 2020.
Temprano nga nagpadulong sa Banga Municipal Gym ang mga luyag mag-donate sang ila dugo kun sa diin madamo nga mga residente ang nakumbinsi kag gin-awhag nga magpartisipar sa nasambit nga aktibidad.
Wala man nagpaulihi ang katapo sang Banga PNP sa pagpanguna sang ila chief of police nga si Maj. Joseph Forro III sa pagdonar sang ila mga dugo.
Suno sa pila ka mga successful blood donors, isa ka maayo nga pamatyagan para sa ila nga makabulig sa isigkatawo kag magpanumbalik ang ila kapagsik makaligad ang pagresupply suno pa sang dugo sa ila mga lawas.
Kaangot sini, gindayaw naman ni Banga focal person to the executive Alex Garcia ang inisyatibo nga ini sang Bombo Radyo labi na nga nagakaigo ang tion sa suplay sang dugo para sa mga nagapanginahanglan sini, labi na sa pamahog sang covid-19 pandemic.
Sa pangkabug-osan, yara sa 46 ang numero sang mga succesful blood donor sa sini nga espesyal nga bloodletting activity, bilang pagsunod sa mga pagsulondan sang DOH tuga sang epekto sang covid-19 pandemic.
Ang Dugong Bombo 2020 isa sa mga tuigan nga aktibidades sang Bombo Radyo Philippines nga kabahin naman sang corporate social responsibility sang network.
