Gintumod ni retired Judge kag Sultan Kudarat Provincial Legal Adviser Lorenzo Balo ang kakulangan sang klaro nga guidelines para sa media sa pag-cover sang nagapadayon nga impeachment trial ni Vice President Sara Duterte.
Sa interview sang Bombo Radyo Koronadal kay Ret. Judge Balo, iya ginpabutyag nga maayo kag puno sang kaalam ang ruling ni Senate President kag impeachment court presiding officer Chiz Escudero may kaangtanan sa Section 18 sang Rules of Procedure sa impeachment trial, ilabi na sa pagdumala sang mga sub judice matters.
Suno sa anay hukom, klaro nga ginplastar ni Escudero ang mga limitasyon sa mga pahayag nga mahimo ihambal sa publiko sang prosecution, defense kag respondent agud malikawan ang pagtalakay sa merito sang kaso nga mahimo magresulta sa trial by publicity.
Apang para kay Balo, kinahanglan pa nga maklaro ang papel kag limitasyon sang media sa pag-cover sang impeachment proceedings.
Suno sa iya, dapat may yara man sang klaro nga giya kon ano ang dapat kag indi dapat himuon sang mga media practitioner sa pag-interview kag pagpangutana sa mga abogado sang prosecution kag defense, pati na sa mga senador nga nagaakto bilang judges.
Ginklaro ni Balo nga bisan spokesperson ang isa ka abogado sang prosecution ukon defense, indi ini nagakahulugan nga hilway na siya sa paghambal sang bisan ano nga pahayag.
Ginpunto ni Balo nga wala nalakip sa ginpahayag nga restrictions ni Escudero ang klaro nga limitasyon ukon giya para sa media sa pagpangutana kag pag-interview sa mga abogado sang depensa, prosecutors kag mangin sa mga senator-judges.
