Nagapaalinton ang Koronadal City Traffic PNP sa publiko nga indi mag maneho kung yara sa impluwensya sang makahulobog nga ilimnon.
Sa esklusibo nga interview sang Bombo Radyo Koronadal kay PMSGT. Leo Dimaculangan ang Korondal City Traffic Investigator .
Ginpayahag ni Dimaculangan nga nagapadayon ang pagpaalinton sang Koronadal City Traffic PNP sa publiko nga mag halong pag abot sa dalanon agud malikayan ang disgrasya.
Madumodoman nga tatlo ka mga pamatan-on nga lalaki ang nautasan sang kabuhi matapos na bangga ang ila ginasakyan nga motorsiklo sa poste sang street light sa National Highway, Purok Paglaum, Brgy. Carpenter Hill, Koronadal City, pasado alas-1:30 sang kahapon sang subong nga Huwebes, Pebrero 19, 2026.
Ginkilala naman ang mga napatay nga sanday, Christopher Kongkong, 24 anyos; John Sebastian, 21 anyos; kag Esakar Engkong, 23 anyos — tanan residente sang Brgy. Saravia sang amo man nga syudad.
Suno pa kay PSMSgt. Leo Dimaculangan nagapauli na kuntani ang mga biktima sang nadulaan sang kontrol ang driver kag direkta nga nagbunggo sa poste nga yara sa center island sang dalan.
Bangod sa kabaskog sang impact, gin-deklarar nga dead on arrival ang tatlo pag-abot sa South Cotabato Provincial Hospital.
Gin-alegar nga yara sa impluwensya sang makahulubog nga ilimnon ang mga biktima.
Samtang, liwat nga nagpaandam ang aton awtoridad sa publiko nga indi magmaneho kun naka-inom kag permi magsuksok sang helmet agud malikawan ang pareho nga insidente.
