KORONADAL CITY – Ginpaidalom na sa state of calamity ang siyudad sang Kidapawan bangud sa napagkit nga mga kaso kag pagkapatay sang pila sa mga diri bangud sa balatian nga dengue.
Ini makaligad nga ginsang-at ni Mayor Joseph Evangelista ang isa ka resolusyon nga ipaidalom sa nasambit nga estado ang ila lugar sang tinalikdan nga Huwebes.
Suno kay Jasna Sucol ang city anti-dengue campaign coordinator nga base sa datos, yara sa 687 na ang napagkit nga kaso humalin sang Enero tubtob sang bulan sang Agosto ukon mas mataas sang 237 porsyento kun ikumparar sang 2018.
Duha ka pasyente man ang kumpirmado nga napatay bangud sa nasambit nga balatian.
Magluwas pa diri, yara sa 40 ka lugar naman sa siyudad ang naglab-ot na sa epidemic threshold nga ginalakipan sang Lanao, Birada, Poblacion, Amas, Paco, Balindog, Sudapin, Manongol, Magsaysay kag Singao.
Bangud diri mas ginpahugtan ang mga tikang agud mabuhinan ang kaso sang dengue pinaagi sa pagbakal sang mga fogging machines, mosquito repellants, kag information drive mangin man ang 4’o clock habit.
Nahibaloan nga ikalima nga local government sa Mindanao ang Kidapawan City nga nagpaidalom sa state of calamity bangud sa dengue.
