Ginalauman nga preparado na ang kampo ni Bise Presidente Sara Duterte sa pag-atubang sang impeachment trial, lakip na ang pagpresentar sang ila mga ebidensiya kag pagsabat sa mga ebidensiya nga ihatag sang House Prosecution panel.
Sa exclusive interview sang Bombo Radyo Koronadal kay Atty. Luke Espiritu, Lawyer and Filipino Labor Leader, importante nga mangin preparado ang depensa ni VP Sara Duterte sa tanan nga alegasyon agud maipakita nila ang ila bahin sa amo nga proseso.
Ginpahayag man ni Espiritu nga posible nga gamiton sang kampo sang bise presidente ang isyu sang pag-resign sa pwesto bilang isa ka tikang agud madala ang kaso sa Supreme Court kag posible makapangayo sang Temporary Restraining Order batok sa impeachment proceedings.
Samtang, ginpahayag sang abogado nga mahimo dako ang epekto sang opinyon sang publiko sa dalagan sang kaso, bangud padayon nga ginatutukan sang mga pumuluyo ang proseso sini.
Bilang isa ka labor leader, ginpabutyag ni Espiritu ang importansya sang impeachment bilang mekanismo agud mapanabat ang mga opisyal sang gobyerno kag masiguro ang accountability sang mga yara sa pwesto.
Dugang pa niya, importante ang amo nga proseso agud mapaguwa ang kamatuoran kag masabat ang mga isyu nga may kaangtanan sa mga opisyal sang gobyerno, agud malikawan ang pagpanunto sa publiko bisan ano pa ang ila ginapanigan nga kampo sa politika.
