Ginawhag ni Barangay Santa Cruz Kagawad Ryan Millan sa syudad sang Koronadal ang iya kasubong nga mga opisyal sang barangay nga magpabilin nga aktibo sa pagserbisyo sa komunidad bisan pa sa wala pa natapos nga diskusyon bahin sa posible nga postponement sang 2026 Barangay kag Sangguniang Kabataan Elections (BSKE).
Sa interview sang Bombo Radyo Koronadal, ginpahayag ni Millan nga kun maaprubahan ang pagpalawig sang termino sang mga incumbent officials, dapat ini gamiton bilang oportunidad para madugangan pa ang mga proyekto kag programa para sa mga residente.
Suno sa iya, ang dugang nga tion sa pwesto indi dapat kabigon bilang pribilehiyo sa baylo isa ka responsibilidad nga dapat gamiton sa paghatag sang mas maayo nga serbisyo kag pagresolbar sang mga kinahanglanon sang komunidad.
Ginpanawagan man niya sa mga barangay leaders nga magpabilin nga malapit sa mga pumuluyo, mangita sang dugang nga suporta kag pondo, kag magpatuman sang mga inisyatibo nga may direkta nga benepisyo sa katawhan.
Samtang ginahulat pa ang pinal nga desisyon sang nasyonal nga gobyerno sa BSKE 2026, ginpasiguro ni Millan nga magapadayon ang Barangay Santa Cruz sa paghatag sang serbisyo sa mga residente bisan ano pa ang mangin resulta sang isyu sa eleksyon.
