Nagpatigayon na sang kasugtanan ang Israel kag ang Hezbollah sang isa ka ceasefire sa Lebanon sang Biyernes, suno sa isa ka opisyal sang Estados Unidos, matapos ang panibag-o nga pagsaka sang tensyon kag kinagamo nga naghulga sa mas dako nga proseso sang pangkalinong sa Middle East.
Suno sa opisyal, nga nagpabilin nga wala ginpakilala ang ngalan, nagsugod ang ceasefire alas-4:00 sang hapon sa Lebanon.
Ginpahayag man niya nga may dako nga papel ang mga negosyador sang Estados Unidos kag Qatar sa pagkreer sang kasugtanan, sa bulig sang Iran.
Antes sini, nagbalik ang mabaskog nga kinagamo sa tunga sang duha ka kampo.
Base sa mga report, 18 ka tawo ang napatay sa mga airstrike sa Lebanon, samtang apat ka sundalo sang Israel ang napatay sa mga opensiba sang Hezbollah.
Bangud sang nagalala nga sitwasyon sa Lebanon, nakanselar man ang ginplano nga pag-istoryahanay sang Estados Unidos kag Iran sa Switzerland.
Importante kuntani ini nga negosasyon para sa posible nga pagbukas liwat sang Strait of Hormuz.
Suno sa isa ka mataas nga opisyal sang Hezbollah, ginpahibalo sang Iran sa grupo nga indi ini makapadayon sa pakig-estorya sa Estados Unidos kon wala sang komprehensibo nga ceasefire deal sa Lebanon.
Samtang, wala direkta nga ginkomentaryuhan sang foreign ministry sang Iran ang nakanselar nga pagtililipon sa Switzerland, apang ginpahayag sini nga may direkta nga responsibilidad ang Estados Unidos sa mga pag-atake sang Israel sa Lebanon.
Dugang pa nila, preparado ang Tehran nga himuon ang tanan nga kinahanglanon nga tikang para maproteheran ang interes sang ila pungsod.
