Napatay ang isa ka amay kag pilason ang iya asawa matapos masunog ang ila puluy-an sa Barangay San Felipe, Tantangan, South Cotabato.
Gin-kumpirma ini sa Bombo Radyo Koronadal ni Fire Inspector Josiah Delmo, acting Fire Marshall sang Bureau of Fire Protection (BFP) Tantangan sa interbyu sang Bombo Radyo Koronadal.
Suno kay Delmo, ginkilala ang napatay nga si Carlos Dequila, 60 anyos, isa ka Person with Disability (PWD) nga indi naka-gwa sa ila balay bangud putol ang iya mga tiil kag naka-wheelchair.
Ginbuligan pa siya sang iya asawa nga si Mercy Dequila apang madasig ang pagdaku sang kalayo gani indi man siya ma-gwa sa ila balay.
Sa matuod, halos nasunog man ang likod nga bahin sang lawas ni Mercy nga nag-angkon sang 2nd degree burn bangud sa sunog.
Nakaluwas naman sa sunog ang bata sang mag-asawa nga si Ivy Dequila, 26-anyos, mga menor de edad nila nga apo nga yara sa walo kag pito ka tuig lang kag abyan sang bata sini nga si Michelle.
Sa karon, nagapadayon pa ang imbestigasyon sang sa ano ang ginhalinan sang kalayo.
Yara sa di magkulang P240,000 naman ang inisyal nga damage assessment sang BFP sa nasunog nga balay sang Pamilya Dequila.
Samtang, emosyonal naman si Mercy sang ma-interbyu sang Bombo Radyo Koronadal bangud sa indi niya masalbar ang iya Mister sa pagkasunog sang ila balay.
Suno kay Ginang Mercy, nagpangayo pa siya sang pasaylo sa iya mister nga indi niya ma-hila palayo sa kalayo.
Sa karon, nagapangayo sang bulig ang pamilya Dequila bangud sa wala sila sang ma-salbar nga gamit kag pati na sa pagpalubong sang iya mister.
