KORONADAL CITY- Gindagsa sang madamo nga mga maukod nga mga tigplamati sang Bombo Radyo Koronadal halin sa nagkalain-lain nga lugar sa South Central Mindanao ang ginpatigayon nga Bombo Medico 2019 sa Koronadal National Comprehensive High School.
Sa nangin interbyu sang Bombo Radyo Koronadal kay Kagawad Berting Malayang sang Brgy Lambangan, T’boli, South Cotabato, yara sa 75 katawo halin sa ila nga barangay ang iya nga gin-imbitarar agud magtambong sa medical, dental kag optical Services sang Bombo Radyo Koronadal.
Suno kay Malayanang, sakay sa 2 dumptruck, ginpadulungan nila ang venue sa syudad sang Koronadal kaupod ang mga kabataan kag mga katigulangan agud nga maka-avail sang libre nga check-up kag makakwa sang libre nga bulong.
Tuman nga ginkalipay sang mga Indigenous People ang nakwa nga libre nga Medical nga serbisyo apisar pa nga naghalin ang mga ini sa malayo nga lugar sa probinsya kag wala man nagduwa-duwa apisar nga naga-ulan.
Nahibaluan nga magluwas sa libre nga check-up kag bulong, nasurpresa man ang mga ini makaligad nga mahatagan sang libre nga bugas tanyag sang Bombo Medico 2019.
